Frauenfeld – la «pitschna Svizra»
E puspè èsi stà Frauenfeld (TG). Cura che la populaziun svizra ha elegì ses parlament il 2015, ha Frauenfeld elegì exact uschia sco l'entira Svizra. Nagin'autra vischnanca era uschè datiers e resplenda meglier ils resultats dad electuras ed electurs en l'entira Svizra. E questa rolla ha Frauenfeld gia dapi decennis. Frauenfeld è uschia quasi in model – la «pitschna Svizra» – pertutgant elecziuns naziunalas.
Tar ils chantuns èsi però ils vischins da l'Argovia ch'han la pli pitschna differenza. Era il Grischun n'ha betg elegì savens fitg auter che la populaziun svizra. Las pli grondas differenzas èn da registrar tar ils chantuns Glaruna ed Appenzell Dadens.
Las partidas dal center crodan – la PPS crescha
Tgi che va cun l'axa cronologica dal 1975 fin il 2015, vesa trends che vegnan e van, sco nivels che van sur la Svizra. Surtut dat en egl dattan ils svilups negativs da la PCD e la PLD ch'eran forzas politicas dominantas. Da l'autra vart la PPS che crescha surtut dapi il 1999.
La pli gronda midada vers la dretga durant quests 40 onns han registrà las vischnancas Vorderthal, Schübelbach, Reichenburg e Wangen (tuttas SZ). Oriundamain dominadas da la PS, han silsuenter la PCD – e pli tard era la PPS – conquistà maioritads tar l'electorat da questas vischnancas.
Midadas cleras vers la sanestra n'èn betg da registrar. Il pli tgunsch anc tar vischnancas grischunas sco Lon, Tschappina, Maton ubain Stussavgia. Questas èn sa muvidas vers il center cun la fundaziun da la PBD.
Pli e pli paucs centers tradiziunals
Ils pli gronds centers da partidas mussan savens sin lur origin. Il Grischun è stà ils ultims onns dominà da la PBD, ils Verd-liberals èn stads il pli derasads en la regiun enturn Turitg. Tar la PCD eri vischnancas dal Vallais Sura, sco per exempel Törbel u Niedergestein ch'han constantamain dà ina maioritad da las vuschs ad ella. Tuttina ha la PCD pers pliras regiuns u centers tradiziunals ils ultims decennis – quai surtut en la Bassa. Sumegliant èsi ì cun la PLD: Ses centers tradiziunals – surtut en la Svizra franzosa– ha ella pers pass per pass a la PPS.
La PS pudeva il 2015 anc quintar cun lur centers en il Giura e Schaffusa. Auter ch'ils Verds, che n'han fin ussa anc betg pudì cristallisar in center d'electorat.
RR actualitad, 06:00