Dapertut en il Grischun rian ellas ed els uss giu dals placats – las candidatas ed ils candidats per la regenza ed il Cussegl grond. Dentant betg be els nizzegian la chaschun da far reclama, mabain er ina gronda fatschenta da mobiglias da Cuira. Ella ha fatg placats che guardan or precis sco placats d'elecziun e giu da quels rian ils collavuraturs. Per exempel sut il motto «Elegiai Roger Jäger! Per Voss nov tarpun da siemi cun ina cussegliaziun nunemblidaivla».
Tant reacziuns positivas sco er negativas
La glieud sin via è surstada e per part er irritada dals placats che guardan or sco placats d'elecziuns. Ils ins èn intgantads da l'idea, auters èn dentant sceptics e na chattan l'idea betg buna, quai irriteschia mo.
Il profi da reclama Gion Fry, che maina in'agentura da marketing, è dentant da l'avis che l'idea da nizzegiar l'attenziun è fitg buna e che l'acziun portia bler a la fatschenta da mobiglias.
RR actualitad 12:00