Il giurist da 37 onns, Elia Lardi daventa il nov directur da la chombra da commerzi dal Grischun e da l'associaziun da patruns. El è vegnì elegì sco successur da Marco Ettisberger che chala suenter 35 onns.
Lardi surpiglia sia funcziun il prim da schaner 2021, ha communitgà la chombra da commerzi. Da professiun è Lardi advocat. Dal 2015 fin il 2019 ha el lavurà tar l'Uffizi da construcziun bassa dal Grischun.
Il nov directur da l'associaziun da patruns e da la chombra da commerzi, vul rinforzar la communicaziun e la digitalisaziun ed intensivar ils contacts tranter ils commembers.