Siglir tar il cuntegn

Header

cuntegn

Empè da reflecturs Cameras termalas per dumbraziun da selvaschina

La dumbraziun da selvaschina en il chantun grischun vegn da nov fatg cun cameras termalas e betg pli cun reflecturs. Quai ha l'uffizi da chatscha chantunal ditg envers il schurnal regiunal dad SRF.

Purtret d'in tschierv en in guaud
Legenda: Keystone

Ils davos 30 onns è la selvaschina vegnida dumbrada cun reflecturs. Quatter persunas, chatschaders u er selviculturs eran si davos, sin in uschenumnà pickup. Durant che quel charrava, vegniva fatg glisch en ils guauds e sin las pradas, per dumbrar animals.

Metoda malsegira

Suenter in accident en in auter chantun, han la Polizia chantunala e l'uffizi da traffic sin via pretendì ch'i stoppian midar metoda da dumbrar.

Tenor il manader da l'uffizi da chatscha dal Grischun, Adrian Arquint, saja la dumbraziun cun cameras termalas dad ina vart pli segira. Ins na stoppia betg esser ordvart l'auto per duvrar quellas cameras. Da l'autra vart na disturbian ins uschia er betg ils animals, sco cun ils reflecturs.

Questa primavaira hajan ins duvrà omaduas variantas per la dumbraziun. Uschia hajan ins pudì rimnar experientschas. Per la dumbraziun da l'onn proxim, duaian ils 60 guardiaselvaschina vegnir equipads cun cameras termalas.

RTR novitads 06:00