Siglir tar il cuntegn

Header

cuntegn

Emprendissadis 700 plazzas betg occupadas en Grischun

Actualmain èn anc radund 700 plazzas d'emprendissadi en Grischun libras. Il pli ferm pertutgadas èn las branschas dal commerzi en detagl, hotellaria e gastronomia, l'industria da construcziun ed interpresas secundaras, automobil, pasterners, metal e maschinas.

Per bleras branschas n'è quest problem dentant betg nov. Er ils onns avant èn bleras plazzas d'emprendissadi restadas avertas là. Las raschuns èn differentas, scriva la Südostschweiz. Tranter auter han las scolas er gì intgins onns cun paucs scolars ch'èn vegnids or da scola. Er saja dentant da vesair che dapli plazzas en la periferia restian libras che per exempel en la regiun da Cuira.

Scrit ora dapli plazzas

Sch'ins piglia il dumber da plazzas d'emprendissadi libras da la fin zercladur sco referenza, sa mussia ch'i haja anc dapli plazzas libras ch'il 2018. Tenor Walter Järmann, vicemanader da l'Uffizi per furmaziun, saja quai dentant da declerar perquai ch'i sajan stadas scrittas ora radund 170 plazzas dapli ch'il 2018.

Dapli mancanza en branscha da construcziun

Andreas Felix ch'è manader da gestiun da la societad d'impressaris constructurs grischuns ha declerà ch'els n'hajan quest onn betg pudì ademplir lur finamira da la quantitad d'emprendists. Problems hajan ins sur tut en las regiuns periferas.

Per dar cuntrapais a quest svilup investeschian ins en dapli reclama per la professiun ed en dapli infurmaziuns, scolaziuns fundamentalas sco era per sa scolar vinavant. Plinavant veglian ins gudagnar dapli dunnas per la professiun. I dettia grazia al svilup tecnic er dapli pussaivladads per dunnas da lavurar en la construcziun.

RR novitads 07:00

Artitgels legids il pli savens