Durant tschintg dis èn fatschentas e manaschis grischuns s'entupads a Cuira sin l'areal da l'Obere Au per exponer e vender lur products ma er per vegnir en contact cun differenta glieud.
Intgins expositurs avessan cunzunt l'emprim di d'exposiziun, il di da Numnasontga, spetgà dapli glieud. Suenter sajan dentant di per di dapli persunas vegnidas. Quai conferma er Sonja Rauner dal comité d’organisaziun.
En tut sajan tenor l'emprima dumbraziun circa 20'000 persunas vegnidas a l'exposiziun, scriva il responsabel Marco Engel en ina communicaziun.
Il motiv ch'igl è stà mesemna e gievgia pli paucs visitaders saja probablamain la bell'aura d'atun. Quella haja plitost carmalà en ils culms enstagl a l'exposiziun. La fin d'emna saja quai sa midà. Cunzunt la dumengia saja stada in grond success, di Rauner.
Furma averta ha plaschì
Als expositurs ha la nova furma d'exposiziun plaschì bain. Ch'i dettia naginas paraids tranter ils stans dettia dapli aria e survista ad els. Plinavant na sa sentian els betg sco serrads en. Sonja Rauner dal comité d'organisaziun ha dentant er udì da visitaders ch'els hajan betg propi chattà la via ed ils stans. Il comité d'organisaziun vuless dentant mantegnair quella furma d'exposiziun.
La proxima GUARDA ha lieu en dus onns. L'auter onn va la GUARDA en viadi e fa part a l'exposiziun «Züspa» a Turitg.
RR actualitad 07:00