Siglir tar il cuntegn
Inhalt

Chantun En il Grischun eran damain persunas senza lavur il favrer

Era en Svizra è la quota da dischoccupaziun sa reducida quest mais.

Gasettas cun plazzas en in Center regiunal per intermediaziun da lavur.
Legenda: Las cifras da dischoccupaziun vesan ora meglier che anc il schaner. Keystone

Cumpareglià cun il schaner è il dumber da dischoccupads en il Grischun sa reducì per 318 persunas. Quai sin 1653 persunas. Uschia communitgescha l'uffizi chantunal per industria, mastergn e lavur. La quota da dischoccupaziun è cunquai sa reducida sin 1,5%.

Era en l'entira Svizra è la quota da dischoccupads ida enavos, quai per 0,1%. La quota da quest mais è tar 3,2% ed è la pli bassa dal favrer dapi il 2012. Quai communitgescha il secretariat statal per economia SECO.

Pli paucs giuvens èn stads senza lavur

Il dumber da las persunas senza lavur è sa reducì per 5’000 sin radund 143’000 persunas. Sa reducida è la quota surtut tar ils giuvens tranter 15 e 24 onns. Cumpareglià cun il schaner eran 4,6% damain giuvenils senza lavur il favrer.

3'300 per mais perdan il dretg sin pajaments da diarias

Passa 3'400 persunas han pers il december da l'onn passà lur dretg sin indemnisaziun da dischoccupaziun, perquai ch'els avevan gia retratg tut ils pajaments da diarias pussaivels ubain ch'il termin da basa era spirà. Quai communitgescha il secretariat statal per economia Seco. En media han stgars 3'300 persunas pers l'onn passà mintga mais il dretg sin pajaments da diarias. Tenor il Seco saja quella cifra relativ auta.

RR novitads 08:00