Bainbaud cumenza la stagiun d'enviern. En vista a quella vulan il chantun Grischun e l'economia publica s'inscuntrar regularmain. En il focus dals discurs tranter las federaziuns economicas grischunas, l'Uffizi da sanadad ed il Departament d'economia publica stettia il barat d'infurmaziun sco er da planisar il manaschi d'enviern en temps da corona, communitgescha l'Uffizi da sanadad.
Perquai ch'il turissem d'enviern è economicamain uschè impurtant, vegnia intensivà il barat tranter las branschas economia, turissem, hotellaria, gastronomia e fatgs da construcziun sco er l'Uffizi da sanadad. Da tegnair distanza e lavar bain ils mauns restan vinavant mesiras effectivas encunter la derasaziun dal coronavirus.
Cifras il mument stabilas
En Grischun è la situaziun da corona per il mument stabila. Actualmain sa chattan en Grischun 20 persunas en isolaziun, radund 56 persunas en quarantina e trais èn en ospital.
