La regenza ha deliberà la missiva tar la revisiun parziala da la lescha d'energia dal chantun Grischun per mauns dal Cussegl grond. Cun ina revisiun da la lescha vul la regenza reducir las emissiuns da CO2 en il sectur dals edifizis ed augmentar l'effizienza energetica dals edifizis. Mira è da gidar a realisar la strategia d'energia 2050 da la Confederaziun.
Adattaziun da la tecnica
Ils edifizis d'abitar fan ora var dus terzs da las surfatschas che retiran energia e pon perquai gidar a moda essenziala da cuntanscher la finamira dal Cussegl federal da reducir las emissiuns a netto nulla en la bilantscha da CO2. Tar in remplazzament d'in stgaudament fossil, duai quel vegnir equipà uschia che 10% dal basegn d'energia po vegnir respargnà u cuvrì cun energias regenerablas.
Promover empè da prentender
Ils princips «promover empè da pretender» sa mussan en las disposiziuns per promover implants fotovoltaics per producir dapli electricitad durant l'enviern. I duain vegnir promovids implants fotovoltaics che produceschan electricitad durant l'enviern e che gidan a serrar la largia da provediment da l'enviern. Uschia pon ins desister sin l'import d'electricitad, che consista savens d'electricitad producida cun charvun u cun forza atomara e che ha per regla ina nauscha bilantscha da CO2.
Il Cussegl grond sa fatschenta probablamain il favrer 2020 cun la materia.
Ord l'archiv
Implant solar a Cazas producescha forza electrica per 46 chasadas.
RTR novitads 09:00