Siglir tar il cuntegn
Inhalt

Chantun Engrevgiar servetsch civil – regenza pli rigurusa che CF

In project federal per render main attractiv il servetsch civil a favur da l’armada va memia pauc lunsch per la regenza grischuna. Quai fa ella a savair la gievgia en ina communicaziun a las medias.

Servetsch civil cun uffants.
Legenda: Memia attractiv – il servetsch civil duai vegnir pli magher a favur d'augmentar la forza da l'armada. Keystone

In project federal per render main attractiv il servetsch civil a favur da l’armada va memia pauc lunsch per la regenza grischuna.

Er regenza vul procurar per dapli schuldada

En general saja ella da medem avis sco il Cussegl federal, scriva la regenza grischuna. Er ella veglia far frunt als facturs «che pericliteschan ils effectivs da l’armada».

Il project da consultaziun dal departament federal d'economia, furmaziun e retschertga (DEFR) che prevesa midadas en la lescha federala davart il servetsch civil na giaja dentant betg lunsch avunda.

Regenza GR: «Mesiras proponidas n'èn betg cunvegnentas»

La regenza dubitescha che las mesiras prevesidas dal Cussegl federal gidian propi da render main attractiv il servetsch civil e fa perquai sezza propostas. En sia communicaziun numna la regenza differents exempels:

  • La dumonda d'admissiun al servetsch civil duai pudair vegnir fatga be tranter la recrutaziun ed avant la scola da recrut.
  • Persunas ch'èn obligadas da far servetsch militar, che vegnan clamadas ad in servetsch d'assistenza u ad in servetsch activ, na duajan betg pli pudair far ina dumonda d'admissiun al servetsch civil.
  • La pussaivladad da pudair absolver il servetsch civil a l'exteriur duai vegnir abolida.

Perquai ch’il Cussegl federal tema da betg pli avair avunda schuldada per l’armada, vul el reducir l’attractivitad dal servetsch civil. Las statisticas mussian ch’il dumber d'admissiuns en il servetsch civil creschia ad in crescher – quai tant al cumenzament dal temp da servetsch, sco er suenter la recruta e perfin or da las ritschas da spezialistas e spezialists u caders da l’armada.

RR novitads 10:00