L'aura è gia durant l'entir enviern fitg instabila. Er per ils proxims dis èsi da quintar cun midadas da l'aura. Suenter ch'igl è stà la fin d'emna e glindesdi fitg miaivel èsi uss puspè vegnì pli fraid. I saja da quintar la mesemna e la gievgia cun naiv en differentas parts dal chantun - perfin enfin a Cuira, di Ivo Sonderegger dad SRF Meteo. En ils culms da la Surselva, nua ch'el quintia ch'i dettia la blera naiv, possià dar 20-50 centimeters naiv nova.
Sin la fin d'emna sa mida l'aura dentant gia puspè. I vegn pli chaud. Cun favugn creschia la temperatura en la regiun da Cuira sin 15 grads.
Enviern da chalira
L'enviern metereologic 2019/20, che cuzza dal december fin fevrer, saja bler memia chaud. I saja perfin in enviern che giaja en la istorgia:
L'enviern 2019/20 è il pli chaud enviern dals ultims 155 onns.
Cumpareglià cun la norma saja il favrer per exempel stà en la Bassa tschintg grads pli chaud. Plinavant mussa il trend ch'ils envierns vegnan adina pli e pli chauds. Ils quatter pli chauds envierns dapi ch'i dat mesiraziuns èn tuts stads ils ultims 30 onns.
RTR actualitad 17:00