Siglir tar il cuntegn

Header

audio
Co nus reagian oz sin epidemias
Or da Actualitad dals 24.03.2020.
laschar ir. Durada: 03:11 minutas.
cuntegn

Epidemias – pli baud ed oz La societad n’è betg pli disada cun malsognas mortalas

Anc avant paucs decennis devi mintg’onn pitschnas epidemias – la virola, il virustgel u la mieur. En il fratemp n’è la societad betg pli disada cun malsognas privlusa, forsa perfin mortalas.

In triumf suenter l’auter ha la medischina pudì festivar ils ultims decennis. Per bleras sorts da cancer – cunzunt da quellas che pertutgan uffants – existian oz terapias, di Flurin Condrau, istoricher da medischina.

Grazia a l’antibiotica sajan bleras malsognas mortalas daventadas be pli in problem da rutina. Ins possia prender intginas pirlas e suenter duas emnas sajan ins saun.

La medischina ans ha fatg crair che nus daventain segir vegls.
Autur: Flurin Condrausociolog ed istoricher

Cun la pandemia da corona vegnian talas tschertezzas forsa reponderadas. I fetschia bain da puspè ina giada vegnir pertschart che la vita ha ina fin, di l'istoricher e sociolog.

La mort haja nossa societad bandischà en las chasas da vegls u en staziuns palliativas. En il fratemp possian ins en Svizra decider sez cun agid dad organisaziuns da murir cura ch’ins less terminar la vita.

La mort senza fatscha

En la pandemia da corona cumpara la mort savens en furma da cifras: il dumber da morts en mintga pajais u la procentuala da mortoris per mintga vegliadetgna. Per part èsi gnanc pussaivel da prender part a sepulturas pervia dal scumond da sa radunar.

La mort daventa uschia invisibla.
Autur: Flurin Condrausociolog ed istoricher

Durant la grippa spagnola vesevan ins or da tge chasas ch’ins purtava ils morts. La mort era pli baud amez la societad, di Flurin Condrau.

Professer per istorgia medicinala

Flurin Condrau è professer a l’institut per etica en la biomedischina e per istorgia da medischina. L'institut perscrutescha a moda interdisziplinara – tant en collavuraziun cun la facultad medicinala sco era la facultad filosofica.

Studegià ha Flurin Condrau a Son Gagl: istorgia, sociologia ed economia publica. La dissertaziun ha el scrit davart la tuberculosa en la Germania e l’Engalterra en il 19avel e 20avel tschientaner.

RTR actualitad 07:00

Artitgels legids il pli savens

Scrollar a sanestra Scrollar a dretga