Siglir tar il cuntegn

Chantun Er dretgiras ston sa tegnair vi da la lescha

La Dretgira chantunala sto publitgar tut las sentenzias, er sche quellas n'èn anc betg decididas cun validitad giuridica. Quai ha il Tribunal federal decidì e cun quai dà raschun ad in recurs da Radio SRF.

tavla da la dretgira chantunala grischuna
Legenda: Er la Dretgira chantunala sto publitgar sentenzias. Keystone

Cura che la Dretgira chantunala dal Grischun ha decidì ina sentenzia va quai anc plirs mais fin che la publicitad, vul dir er las medias, dastga dar in sguard viaden. Pir cura che la sentenzia ha la validitad giuridica (liquidada dal tut, senza recurs a la proxima instanza) publitgescha la Dretgira chantunala las sentenzias. Cunter questa pratica ha il schurnal regiunal grischun da SRF fatg recurs avant il Tribunal federal - e survegnì raschun.

Tegnair secret sentenzias enfin la validitad giuridica na saja betg transparent avunda, uschia han decidì ils derschaders da Losanna. Cun tegnair secret na possian las medias betg rapportar ed infurmar a moda actuala. Las medias hajan numnadamain er ina funcziun da controlla per las dretgiras. Cun rapportar da sentenzias actualas sappia la publicitad giuditgar sche las partidas, ch'èn dal reminent anonimisadas, èn vegnidas tractadas correctamain. Las sentenzias sajan en general da publitgar u da metter a disposiziun sin dumonda, uschia la decisiun dal Tribunal federal. Er las Dretgiras districtualas han da publitgar sentenzias, almain sin dumonda.

Chantun mida practica

Tenor Norbert Brunner, president da la Dretgira chantunala dal Grischun, as possia proximamain chattar sin la medema pagina d'internet per la tschertga da sentenzias terminadas er las sentenzias anc betg valididas giuridicamain. El na sappia dentant betg garantir, che quai succedia anc il medem di sco la sentenzia vegn fatga. I dovria anc insaquants dis per anonimisar la sentenzia. La lavur che vegnia anc vitiers tar la Dretgira chantunala è, da marcar las sentenzias cun lur stan actual, pia per exempel «anc betg validì giuridicamain» ubain «i vinavant tar la Dretgira federala».

Da la sentenzia da Losanna è Norbert Brunner in zic trumpà. Tenor el fa quai senn da spetgar enfin ch'il cas è terminà avant che da publitgar. El crititgescha er, che las debattas giudizialas sajan publicas e che las medias possian era visitar quellas per esser infurmadas. Dentant durant las debattas sajan mintgamai be fitg paucs schurnalists preschents.

RR novitads 12:00