Siglir tar il cuntegn
Inhalt

Chantun Er persunas natiralas en il focus da la giustia

Betg be las firmas sezzas, involvidas en il scandal da cartel, mabain er ils organs da quellas pon vegnir chastiads. La procura publica ha confermà envers RTR ch'ins saja vidlonder d'intercurir eventuals pass per instradar ina procedura penala.

Tabla avant plazzal da construcziun en l'Engiadina Bassa.
Legenda: La procura publica examinescha pli exact il scandal da cartel en l'Engiadina Bassa. Keystone

Suspect d'ina pussaivla falsificaziun da documents e fraud. Quai èn ils delicts che motiveschan la procura publica dad examinar pli exact il scandal da cartel en l'Engiadina Bassa. En il focus da questas retschertgas n'èn però betg be las firmas mabain era ils impressaris sezs.

Contracts cunter embrugls

Tar surdadas da lavurs da submissiun èsi numnadamain usità ch'ils impressaris decleran en in document ch'els na fetschian nagin embrugl envers lur patrun da construcziun. Sche quai sa verifitgass però, lura ston quellas persunas che han suttascrit quests documents quintar cun ina denunzia penala e chastis da plirs onns praschun.

Indizis concrets n'ha la procura publica anc nagins fin uss. Però gia in suspect sco tal tanscha per ch'ella sto vegnir activa en chaussa.

RR novtiads 06:00