Siglir tar il cuntegn

Header

cuntegn

Chantun Erizuns daventan in’incumbensa chantunala

Cun 73 cunter 24 vuschs han deputadas e deputads decis da sustegnair ina incumbensa or dal Cussegl grond. Per installar la staziun impunda il chantun uschia maximalmain 100’000 francs. Silsuenter dat quai mintg'onn 5’000 francs.

En il futur pudess la staziun da tgira per erizuns tgunsch vegnir manada da la pensiun d'animals ARCHE a Cuira. In concept per ina staziun d’erizuns chantunala è vegnì elavura en collavuraziun da dal substitut dal veterinari chantunal e la pensiun d’animals ARCHE.

La deputada Tina Gartmann-Albin.
Legenda: L’incumbensa per la fatschenta è vegnida da la deputada da Cuira Tina Gartmann-Albin. RTR, M. Decurtins

100‘000 francs pervia da la lescha

Che la staziun d’erizuns in spe duai custar 100‘000 francs po far surstar areguard da la grondezza dals animals che duain lura in di vegnir tgirads en quella. Responsabel per quests custs èn il sa cuntegnair social da l’erizun e las perscripziuns en l’ordinaziun davart la protecziun dals animals e la lescha davart la protecziun da la natira chantunala. L’erizun è in animal selvadi protegì en il Grischun.

Mastgels agressivs

In ferm factur per ils custs è, ch’ils erizuns dovran relativamain bler plaz. Ils mastgels attatgan e mazzan schizunt in l’auter, sch’els ston viver sin in spazi memia pitschen. Il concept d’erizuns prevesa ina capacitad da maximalmain 72 erizuns. Quels ston pudair star en spezials containers en l’intern ed en spazis separads in da l’auter sut tschiel avert.

RR Novitads 14:00

Artitgels legids il pli savens