Siglir tar il cuntegn
Inhalt

Chantun Fabritgar cun grond ristg e senza gudogn

Savens survegn la firma cun la pli favuraivla offerta l'incumbensa. Quai smatga sin il pretsch e sin las marschas. Sche betg tut funcziuna sco planisà, daventa or dal pign gudogn spert ina perdita.

Andreas Felix na fa betg quitads per la branscha da fabricaziun.
Legenda: Andreas Felix na fa betg quitads per la branscha da fabricaziun. RTR, G.M. Maissen

La publicaziun dal concurs da la firma da construcziun auta Luzio SA ha fatg surstar. Malgrà ch’ins ha adina puspè pudì leger il num da la firma sin differents plazzals en la regiun da Cuira ha la firma ussa serra las portas. Quai betg pervi da mancanza da lavur, mabain pervi da las sperditas tar mintga lavur. Dudesch dals quindesch lavurers han gia puspè ina nova plazza da lavur.

Savens èsi uschia: La pli favuraivla offerta survegn l’incumbensa. E lura è quai in cumbat extrem per il meglier pretsch en la branscha. Quai po per las firmas avair consequenzas fatalas. Uschia era per nus.
Autur: Martin LuzioSchef Luzio SA

Uschia ha la Luzio SA lavurà per pli pauc ch'ils custs effectivs. Enfin èn ils mez liquids stads duvrads si. Sco giuven impressari na ha Martin Luzio betg gì a disposiziun gronds meds agens e vitiers n'ha el era betg gì il temp da crear ina segunda funtauna d’entradas. Luzio aveva surprendi la Firma 2013 da Franco Lurati. La firma Lurati era vegnida fundada il 1957 dal bab Aldo Lurati.

En la branscha da construcziun fa strusch ina firma gudogn. Quasi tuts scrivan cifras cotschnas.
Autur: Martin LuzioSchef Luzio SA

La situaziun difficila è enconuschenta

Era il president dals impressaris da constructurs grischuns, Andreas Felix, enconuscha questa situaziun problematica. In motiv principal per la concurrenza pli gronda è la iniziativa da segundas abitaziuns. Cun quai che tschertas regiuns n’han betg pli uschè blera lavur han quellas firmas simplamain engrondì lur territori. Là concurrenzeschan els natiralmain alura las firmas existentas. Per tuttina survegnir las incumbensas sbassan las firmas il pretsch. Quai possia avair consequenzas, sa era Andreas Felix.

Sche betg tut funcziuna sco planisà tar ina fabricaziun po cun las pitschnas marschas spert daventar or dad in pitschen gudogn ina sperdita.
Autur: Andreas FelixPresident impressaris da constructurs grischuns

Midadas en la branscha dovran temp

Andreas Felix na fa dentant betg quint ch'ina firma da fabritgar suenter l’autra sto ussa serrar las portas. A vegn plitost ad esser uschè che mintga firma ha da reducir il numer da lavurers. Uschia haja gia dà 5% pli pauc lavurers il 2015 cumpareglià cun il 2014. Per l’onn current fa Andreas Felix quint cun in sumegliant svilup. El è dentant era da l'avis ch'i vegnia en il futur puspè a vesair ora meglier per la branscha da fabritgar. Uschia dettia blera lavur da privats sco era dal maun public. Las firmas da fabritgar stoppian simplamain adattar a la situaziun actuala. Tut tenor era cun midar in zic lur concept da firma.

RR actualitad