Siglir tar il cuntegn
cuntegn

Chantun Far il pur resta attractiv

Purs giuvens èn bain motivads da surpigliar manaschis. In indicatur che mussa quai èn las dumondas per credits da start, che vegnan repartids a l'agricultura da la societad per credits. Las dumondas per quests credits èn restadas pli u main constantas ils davos onns.

Roman Niederberger, in pur giuven che ha surpiglià in puresser a Fidaz.
Legenda: Roman Niederberger, in pur giuven che ha surpiglià in puresser a Fidaz. RTR, C. Albin

En media munta in credit da start per purs giuvens a rodund 150’000 francs. Sin uschè in credit ha in pur il dretg, sch'el è pli giuvens che 35 onns e fa ina pli gronda investiziun. Ils dus onns passads han mintgamai 34 purs dumandà per in emprest. Quai è dapli che la media dals davos tschintg onns.

Hansjörg Hassler
Legenda: Il prresident dalla societad per credits all' agricultura è l' anteriur cusseglier naziunal Hansjörg Hassler. MAD

Dumber da purs na sa sbassa betg , il link avra en ina nova fanestra

Sch'ins guardia sin questas cifras, possian ins dir ch'il dumber da purs giuvens na giaja betg enavos fermamain, constatescha Hansjörg Hassler, il president da la societad per credits a l'agricultura. Tenor Hassler na ston ins betg far quitads ch'i dettia adina pli paucs purs che vegnan suenter. I dettia dentant tschertas regiuns ch'ils purs giuvens prefereschian envers autras.

Senza credit betg pussibel

Roman Niederberger è in dals purs giuvens, che han survegnì in credit da start da la societad per credits a l’agricultura dal Grischun. Dapi l’entschatta da quest onn maina el ses agen puresser a Fidaz sur Flem. In puresser cun 48 hectaras prads e bunamain 100 chaus biestga.

«Surpigliar quest puresser senza l’agid finanzial da la societad per credits na fiss betg stà pussibel», conferma l’um da 27 onns. I saja in credit senza tschains, ch’el stoppia rembursar entaifer 12 onns.

Legenda: Guardar il video Roman Niderberger, in giuven pur a Fidaz. Durada 00:59 minutas.
Or da RTR dals 21.06.2016.

Mo il credit na tanscha betg

Il credit che Roman Niederberger ha survegnì muntia a pli che la mesadad da la summa ch’el haja stuì pajar per il bain. I saja in impurtant agid e tuttina...mo il credit na tanschia betg. Per pajar il rest da la summa haja el survegnì daners da sia famiglia. Ultra da quai saja l’anteriur possessur vegnì encunter cun il pretsch. Entschaiver sia atgna existenza sco pur senza far daivets na saja deplorablamain strusch pli pussaivel ozendi.