Siglir tar il cuntegn

Header

audio
Mezdi: L'Uffizi da migraziun quinta cun deficit
Or da Actualitad dals 18.12.2019.
laschar ir. Durada: 02:44 minutas.
cuntegn

Fatgs d'asil grischuns Damain requirents d'asil, dapli deficit

L'Uffizi da migraziun dal Grischun scriva cifras cotschnas. A partir dal 2021 pudess il deficit muntar a fin 700'000 francs ad onn, ha ditg il manader da l'uffizi Marcel Suter envers il schurnal regiunal da SRF. Quel stoppia vegnir pajà ord il budget chantunal.

Gia oz dettia perditas, declera Suter. Ins haja dentant anc da la vart daners per cuvrir il deficit. Grazia a mesiras da spargn saja la perdita cleramain pli pitschna che budgetada.

Divers motivs

Sin il punct culminant da la crisa da fugitivs il 2015/2016 hajan ins schlargià las structuras d'asil.

Las structuras existan anc, nus avain anc il persunal ed ils alloschis d'asil.
Autur: Marcel SuterSchef da l'Uffizi da migraziun

Entant sajan ils dumbers d'asil sa sminuidas marcantamain e vitiers haja dà ina midada dal sistem. Dapi quest onn ellavurescha la Confederaziun sez ina gronda part da las dumondas d'asil, munta ch'il chantun ha da tractar pli paucas dumondas.

Sco er auters chantuns hajan ins reagì sin la nova situaziun e realisà mesiras da spargn.

Nus n'avain betg pli prolungà contracts da lavur limitads e gia serrà emprims centers d'asil.
Autur: Marcel SuterSchef da l'Uffizi da migraziun

L'effectiv da collavuraturas e collavuraturs saja sa reducì dapi il 2017 da radund 200 sin 160, di Suter.

Ulteriuras adattaziuns èn necessarias

Sch'ils dumbers d'asil restan er vinavant uschè bassas, stoppian els ponderar da serrar ulteriurs centers d'asil. I na sajan betg da quintar ch'ina ulteriura reducziun dal persunal possia vegnir realisà sulet sur la fluctuaziun natirala, di Suter.

Il manader da l'Uffizi avertescha dentant d'ina runda da spargn radicala.

I dat il privel ch'ins n'è betg pront sche la situaziun sa mida.
Autur: Marcel SuterSchef da l'Uffizi da migraziun

Perquai dovria ina tscherta reserva per pudair reagir sveltamain sin dumbers d'asil creschents.

Per tadlar curt e concis:

RTR novitads 06:00