Siglir tar il cuntegn

Header

cuntegn

Favrer 2020 1’300 persunas senza lavur en il Grischun

Cumpareglià cun il schaner 2020 è il dumber da dischoccupads sa reducì levet. Quai scriva l'Uffizi per industria, mastergn e lavur dal Grischun. En tut eran il favrer 1'300 persunas senza lavur, quai che correspunda ad ina quota da dischoccupaziun da 1,2%.

353 dunnas e 947 umens

Da las 1'300 persunas senza lavur eran 353 dunnas e 947 umens. La pli gronda quota da dischoccupads ha l'industria da construcziun (514 persunas), hotellaria (130 persunas), commerzi en detagl (71 persunas), sectur da la sanadad (62 persunas) e lura anc en il sectur da servetsch (55 persunas). Il favrer èn vegnids dumbrads 49 dischoccupads a lunga durada, il mais avant eran quai er 49 persunas.

Lavur curta en il Grischun

En il Grischun hai dà il favrer tschintg manaschis cun total 222 lavurantas e lavurants. Il schaner eran quai anc dus manaschis (cun 58 lavurants) ch'avevan annunzià lavur curta.

Svizra – dischoccupaziun da 2,5%

En l'entira Svizra èn stadas 117'822 persunas senza lavur il favrer. Quai correspunda ad ina quota da dischoccupaziun da 2,5%, sco quai ch'il Secretariat da stadi per l'economia SECO scriva. En Svizra tschertgan 72'577 persunas che n'èn betg registradas sco dischoccupadas ina lavur.

RTR novitads 09:00