Atgnamain pareva la festa per il nov president dal Cussegl grond d'esser ditga giu. Ina pli pitschna delegaziun è tuttina sa rimnada a Tumein per festivar l'elecziun da Martin Wieland sco pli aut Grischun.
L'um da 63 onns ch'è president da vischnanca da Tumein è vegnì festivà en ina tenda da festa cun musica, in apero e divers pleds. Tranter auter ha er il president da la regenza, Christian Rathgeb, discurrì:
Jau giavisch ad el in fitg bel onn. Ch'el possia giudair ses uffizi da represchentar il chantun. Ch'el haja bels muments ed inscunters e ch'el saja preschent tar la populaziun.
Sco punct culminant è Martin Wieland vegnì onurà sco burgais d'onur da la vischnanca da Tumein. In titel che haja fatg ad el gist tant plaschair sco l'elecziun sco president dal Cussegl grond.