«Ils hotels eran emplenids, ils giasts devan ora bler ed els eran cuntents», di Ernst Wyrsch, president da hotelleriesuisse Grischun. Uschia resumescha el ils resuns, ch'el ha survegnì da hotels da dus fin tschintg stailas da tut il chantun.
Tenor el eran las ultimas duas emnas quest onn anc pli bunas che l'onn passà. Be las emprimas duas emnas dal december na sajan betg stadas uschè bunas, di el envers RTR.
Anc naginas cifras concretas – dentant buns resuns
La statistica en detagl dal mais december fan las uniuns da turissem pir durant il schaner. Per il mument n'han ils directurs da turissem da las regiuns anc betg ina survista cumpletta. Betg tut las reservaziuns van sur lur organisaziuns. Envers RTR din dentant er divers dad els, ch'els sajan cuntents cun ils dis da festa. Per part sajan tut las stanzas stadas occupadas.
Motiv per ils buns dis da festa saja dad ina vart la naiv. Tenor Bruno Fläcklin, il directur da turissem da Lai, sajan ils dis da festa er stads repartids bain.
RR novitads 17:00