Per che la citad da Cuira dat il permis definitiv per far in festival sin l'areal da l'Obere Au, avessan ils organisaturs stuì inoltrar lur concepts. Quai n'è betg vegnì fatg, er suenter pliras dumondas da la citad da Cuira. Il president da la citad, Urs Marti è segir ch'ils concepts na vegnan betg pli inoltrads e perquai na vegn il festival er betg ad avair lieu.
En tschintg mais n'è quai betg realistic dad organisar uschè in festival.
Stads a guardar l'areal cun la polizia
Er la polizia da la citad è involvida. Ella era cun ils organisaturs sin l'areal da l'Obere Au per guardar la localitad. Per la fin da schaner era lura anc planisà ina proxima scuntrada tranter polizia da citad ed organisatur. Sche quella vegn ussa er ad avair lieu n'è anc betg decidì, ha la polizia ditg a RTR.
Nus essan vid evaluar il cas ed avain anc da decider sche l'inscunter ha lieu.
Reservà tuttas chombras en l'hotel «City West»
Tar l'hotel «City West» han ils organisaturs dal festival reservà tut las stanzas da durmir, quai per in pretsch spezial. In sponsur n'èn hotel e center da shopping però betg.
Er las Viafiers federalas svizras èn annunziadas sin la pagina dal festival sco partenaris. Sch'ins cumpra in bigliet dal festival possian ins ir gratuit cun il tren enfin Cuira. In contract cun ils organisaturs n'ha la SBB dentant er betg, han ellas tradì envers Urs Marti.
Er sch'i ha dà bleras dumondas ch'ins n'ha enfin oz anc betg sclerì, Urs Marti na vegn betg a dar il permis.
Era sche quai è donn per Cuira, il festival vegn betg ad avair lieu.
RTR actualitad 17:00