Siglir tar il cuntegn

Header

Foto Andreas Glaser
Legenda: Keystone
cuntegn

Finalmain puspè sessiun «Cussegl grond avess stuì sa radunar pli baud»

En la crisa da corona ha la regenza grischuna prendì enta maun las hottas ed ha decidì differentas mesiras. Quai saja normal – uss saja dentant nairas uras ch'il Cussegl grond vegnia activ, di il directur dal Center da democrazia ad Aarau Andreas Glaser.

La sessiun d'avrigl ha il Cussegl grond stritgà pervia da la crisa da corona – persuenter è la sessiun actuala pli lunga e bain emplenida cun temas.

«I va per ina debatta publica»

Era sche deputadas e deputads vegnian strusch a refusar mesiras che la regenza grischuna haja decis durant il temp dal lockdown, saja fitg impurtant ch'i dettia ina debatta publica, accentuescha l'expert per dumondas da democrazia Andreas Glaser.

È la democrazia en la crisa durant la crisa?

Cun annullar votaziuns, debattas e radunanzas ha la Svizra restrenschì massivamain ils dretgs politics da mintgina e mintgin. Quai saja in problem per la democrazia directa.

Ins sto puspè reanimar il pazient democrazia directa.
Autur: Andreas GlaserDirectur Center per democrazia Aarau

A la regenza grischuna fa Andreas Glaser dentant era in cumpliment: La decisiun da laschar votar a l'urna era en vischnancas che decidan normalmain a radunanzas communalas saja stà in'idea progressiva.

Critic vesa el l'agir da tscherts parlaments communals durant la crisa da corona – parlaments che han tegnì sesidas senza public e senza livestream.

Sesidas d'in parlament senza publicitad – quai na va betg.
Autur: Andreas GlaserDirectur Center per democrazia Aarau

Tut en tut saja da sperar che la crisa da corona dettia in stausch per ina «democrazia digitala». Quai vul dir per exempel: Dapli livestreams da debattas, sesidas via conferenza digitala, rimnar suttascripziuns a moda electronica.

RTR actualitad 07:00