Siglir tar il cuntegn

Chantun Finanzas e transparenza a la sessiun da favrer dal Cussegl grond

A Cuira ha cumenzà oz la sessiun da favrer dal Cussegl grond. Durant trais dis vegni a dar discussiuns e debattas. Ils temas centrals da questa sessiun èn las finanzas e la transparenza.

Oz sa radunan commembras e commembers dal Cussegl grond a Cuira per ina sessiun.
Legenda: Igl è puspè temp: Oz sa radunan commembras e commembers dal Cussegl grond a Cuira per ina sessiun. Keystone

En ses pled d'avertura ha il president Vitus Dermont mess en il center las relaziuns tranter ils differents acturs politics. Sulet cun bunas relaziuns dettia era bunas schliaziuns ha ditg Dermont.

In tema central èn las finanzas

In tema central da la sessiun da favrer 2016 dal Cussegl grond èn las finanzas. Qua datti duas tractandas, numnadamain il plan da finanzas per ils proxims quatter onns, ed il program da la regenza.

Cifras cotschnas fan spargnar

Il plan da finanzas prognostitgescha cifras cleramain cotschnas per il chantun Grischun, quai a partir dal 2018. Quest deficit chantunal pudess lura restar uschia fin il 2019, u schizunt il 2020.

Impurtant da savair è, ch’il parlament na sto dir ni gea ni na ad insatge. El sto simplamain prender enconuschientscha dal plan da finanzas e dal program da la regenza. En conclusiun munta quai, che mintga partida e mintga fracziun survegn la chaschun da s’exprimer davart lur plans per spargnar.

Per tgi duai valair il principi da transparenza?

In auter grond tema vegn ad esser la transparenza. Las deputadas ed ils deputads decidan quest’emna, quants documents uffizials duain daventar accessibels per tuts, e quants che duain restar secrets. La regenza propona d’avrir tuts documents a la publicitad.

En il Grischun èn documents uffizials da principi secrets; almain fin uss. Entant han blers auters chantuns en Svizra gia introducì il principi da transparenza. Il Grischun è in dals ultims chantuns ch’ha da decider davart quest pass.

Ina dumonda ch’è anc averta è, sche la nova transparenza duess valair be per il chantun, u era per las regiuns e las vischnancas. Durant la consultaziun èn la maioritad da las vischnancas sa dustadas cun mauns e pais cunter ina transparenza.