Bun 400 recurs èn vegnids inoltrads a las vischnancas da Flem, Laax e Falera pertutgant la nova lescha da turissem ch'è en vigur dapi il schaner 2015. Oravant tut la taxa da giasts è dispitaivla.
En collavuraziun cun las vischnancas è la cuminanza d'interess dals possessurs d'abitaziuns secundaras però sa cunvegnida d'inoltrar quatter cas exemplarics a la dretgira administrativa.
Quella vegn a la conclusiun che las trais vischnancas hajan ademplì las premissas tar las taxas da giasts incassadas. Tranter auter vegnian ils daners ch'ellas hajan incassà cun quella taxa, duvrads a moda correcta e las vischnancas na fetschian nagin gudogn cun quellas. Per motivs pratics lascha la dretgira era valair che la taxa da giasts vegn incassada annualmain a moda pauschala en las trais vischnancas.
Possessurs da secundas abitaziuns èn trumpads
Tenor Reto Fehr, il president da la gruppa d'interess da possessurs da secundas abitaziuns a Flem, Laax e Falera, è la gruppa trumpada da la decisiun da la dretgira administrativa. Els hajan sperà d'almain survegnir dretg en singuls puncts da lur recurs, che tut ils puncts vegnian dentant refusads n'hajan els betg spetgà. Uss stoppian els ina giada analisar l'argumentari da la dretgira e lura decider, sch'els veglian trair enavant la decisiun al Tribunal federal a Losanna. Reto Fehr spera pudair communitgar la decisiun aifer ils proxims 10 dis.
Vischnancas èn cuntentas cun la sentenzia
En ina communicaziun communabla per tut las trais vischnancas scriva il president communal da Flem, Adrian Steiger, che la decisiun da la dretgira confermia la lavur da las vischnancas. Las vischnancas sajan levgiadas da questa sentenzia che mussia che las leschas correspundian al dretg surordinà.
RR novitads 12:00