Igl è stà in cumià emoziunal a la fin da la sessiun da december. A la fin dals pled uffizials hai dà lung applaus e standing ovations per Barbara Janom Steiner (BPD) e Martin Jäger (PS).
La via politica da Barbara Janom Steiner
- 2000-2007 presidenta da la PPS Grischuna
- 2003-2008 deputada en il Cussegl grond
- Matg 2008 cussegliera guvernativa (PBD)
- 2008-2012 scheffa dal departament da giustia, segirtad e sanadad
- Dapi mars 2012 scheffa dal departament da finanzas e vischnancas
- 2012 e 2017 presidenta da la regenza
L'atgna iniziativa, l'atgna responsabladad ed il respect – quai saja stà impurtant per Barbara Janom Steiner, ha ditg la presidenta dal Cussegl grond, Tina Gartmann-Albin, en ses pled da cumià. Cun esser sincera e directa, sche necessari er stinada, haja ella cuntanschì stediamain sias finamiras.
Tar ils numerus merits tutgian las finanzas chantunalas che Barbara Janom Steiner haja adina tegnì equilibradas. E sias stentas per la refurma da finanzas e la refurma da las vischnancas. Cura ch'ella aveva surpiglià il departament da finanzas e vischnancas il 2012 devi 176 vischnancas en il Grischun – cun l'entschatta dal 2019 datti anc 106.
La via politica da Martin Jäger
- 1979-1983 deputà en il Cussegl grond (PS)
- 1997-2008 cusseglier da la citad da Cuira e deputà en il Cussegl grond
- Dapi 2011 cusseglier guvernativ/schef dep. d'educaziun, cultura ed ambient
- 2015 president da la regenza
Las sfidas en la politica da linguatg, scola e cultura sajan stadas grondas – e sajan er stads ils success da Martin Jäger, ha punctuàTina Gartmann-Albin en ses pled da cumià.
Cun la revisiun totala da la lescha da scola saja gartegià insatge ch'i dettia en quella furma be en il Grischun. Era la revisiun da la lescha da scolas medias e la lescha da scol'autas portia sia suttascripziun. Na d'emblidar ses engaschi per la pasch linguistica en il disput rumantsch grischun ed idioms.
Accents haja Martin Jäger era mess cun las leschas per promover la cultura ed il sport. In dinosaur politic bandunia il parlament. Dapi l'onn 1979 en il Cussegl grond (sco deputà u cusseglier guvernativ) haja nagin auter en sala ina pli lunga memoria.
RR novitads 18:00+
