«Forever Young» ha la band Alphaville gia chantà ils onns 80. Adina restar giuven, cumbatter la vegliadetgna e chapir il vegnir vegl, quai emprova la perscrutaziun gia daditg.
Tips e cardientschas blauas
Ins è mo uschè vegl sco quai ch'ins sa senta, hai num, dentant è quai propi uschia? Mintgin da nus vegn pli vegl, tegnair si il process na san ins uss dentant anc betg. En l'internet datti blers tips e trics che empermettan da restar pli ditg giuven. Savens èn ils tips chaussas evidentas sco per exempel: mangiar sanadaivel, sa mover bler, baiver bler'aua, durmir avunda ed uschia vinavant. Paginas da lifestyle e fatschentas empermettan dentant era da restar giuven e fit cun products e tips in pau pli abstrus.
Funtauna da la giuventetgna resta in misteri
Sco era la chanzun «Forever Young» datti la gerontologia moderna (perscrutaziun da vegliadetgna) pir dapi bun 30 onns. Success han ils scienziads anc uss be gì tar verms, peschs e mieurs. Là èsi gartegià da tegnair si il process da vegliadetgna.
Anc è avert sch'ils scienziads san propi era far il pass tar il process da vegliadetgna dal carstgaun. Per ch'ils carstgauns vegnian effectivamain pli vegls, stoppian ils scienziads betg mo tegnair si la vegliadetgna, mabain era cumbatter las malsognas da la vegliadetgna. Pia malsognas dal cor, diabetes, cancer, demenza ed Alzheimer.
La funtauna da la giuventetgna perpetna n'è anc ditg betg chattada, la tschertga resta pia vinavant interessanta.
RTR actualitad 07:00