La regenza surdat il Premi grischun da cultura 2020 a Guido Baselgia. Il fotograf da Malans haja stgaffì ils ultims 30 onns in'ovra artistica da gronda impurtanza, hai num en la communicaziun. Ses maletgs en alv e nair da las muntognas dal Grischun, da las cuntradas da la Bolivia e dal guaud tropic en l'Ecuador fetschian visiblas las basas da la terra e la vulnerabilitad dal mund.
Guido Baselgia (1953) saja in observader cumpetent da la realitad, in poet da la glisch ed in maister da l'artisanadi e da la tecnica da la fotografia, scriva la regenza. Turnà a chasa da ses viadis sviluppia el en sia chombra stgira a Malans maletgs d'ina bellezza impressiunanta. Il premi è dotà cun 30'000 francs.
Premis da renconuschientscha e promoziun
Plinavant surdat la Regenza set premis da renconuschientscha ed otg premis da promoziun da mintgamai 20 000 francs.
In premi da renconuschientscha da 20'000 francs survegnan:
- René Schnoz (1966), actur e reschissur, Mustér/Turitg
- Mübeccel Akdis (1960) e Cezmi Akdis (1961), scienziada e scienzà da la natira, Tavau
- Cäcilia Bardill (1948), magistra e politicra da musica, Tavau
- Breitbild, rapunzs, Cuira
- Miriam Cahn (1948), artista, Stampa/Basilea
- Ursina Hartmann (1950), actura e reschissura, Cuira
- Gruppa culturala St. Antönien
In premi da promoziun da 20'000 francs survegnan:
- Elia Aubry (1984), artist, Sevgein/Berna
- Jessica Zuan (1984), autura, Samedan/Barcelona
- Asa S. Hendry (1999), autura ed actura, Lumnezia
- Chiara Jacomet (1999), chantadura, Rabius
- Andrea Furger (1995), fotograf, Mesauc/San Murezzan
- Carla Gabriela Engler (1992), scienziada da film ed artista, Zizers/Turitg
- Marina Woodtli (1987), artista, Cuira/Basilea
- Jérôme Keel (1998), battarist, Panaduz
Ils premis vegnan surdads en il rom d'ina festa che ha lieu ils 12 da zercladur 2020 a las 17:15 a Malans.
RTR novitads 09:00