Da Tusaun a Flem. Quest viadi ha Franz Walt fatg, però betg direct, mabain cun sviadas sur l'entir mund. Amsterdam, Barcelona, New York e Singapur èn be insaquants lieus, nua che Walt ha gia vivì. El saveva gia da buob cun guardar sin il piz Beverin – ch'el vulessia in di vesair l'entir mund.
Quai ha el lura era fatg. El ha studegià economia en l'America e pli tard fatg carriera tar il gigant da farma e diagnostica Roche. Enfin ch'in auter gigant ha carmalà davent el da là, numnadamain Siemens.
Pensiun – insaquantas emnas
E suenter 30 onns en questas duas firmas ha Franz Walt vulì ir en pensiun. Quai è el stà dentant be insaquantas emnas. Il pitschen start-up en la diagnostica cun il num Quotient ha vulì Walt per purtar la firma sur l'arrivada. Walt ha prendì encunter il job e maina dapi dus onns e mez la firma a Nyon. La pensiun ha l'um da 61 onns pia spustà sin pli tard, dentant ragischs ha el tuttina gia fatg – e quai puspè en il Grischun.