Siglir tar il cuntegn

Header

audio
Abitaziuns secundaras: Baininqual preferescha uss ellas a la citad
Or da Actualitad dals 02.04.2020.
laschar ir. Durada: 3 minutas 47 Secundas.
cuntegn

Fugia en domicil da vacanzas Baininqual preferescha l'abitaziun secundara a la citad

Cifras exactas na datti il mument anc betg. Ma las vischnancas appelleschan actualmain per incumbensa dal chantun a possessurs da s'annunziar sch'els èn en vischnanca. Las datas dovra il chantun cunzunt per planisar il provediment en ospitals – letgs, persunal ed ulteriur urden medicinal.

Ma gia avant l'appell actual da s'annunziar han las vischnancas analisà la situaziun. Las vischnancas da Flem e Claustra han analisà sin incumbensa dal chantun las cifras da la serenera. A Claustra mussian quellas ch'igl haja actualmain quasi be indigens en vischnanca, pia strusch giasts.

In zic auter auter sa preschenta la situaziun a Flem: Igl haja bain dapli giasts ch'usità da quest temp, ma betg tant sco durant la stagiun auta, uschia il president communal, Adrian Steiger. Era hajan els constatà che la rait da communicaziun e cunzunt quella d'internet svelt vegnia duvrada pli intensivamain. Intgins possessurs da segundas abitaziuns han er laschà installar pli sveltas colliaziuns d'internet per lavurar da chasa anora. Però avess il provedider quintà cun anc dapli dumondas.

Nus avain gì possessurs da segundas abitaziuns che han laschà installar ina colliaziun d'internet pli svelta per lavurar da là anora. Ma nus avessan spetgà anc dapli dumondas.
Autur: Inge Maissen collavuratura da Flims Electric

Breil e Mustér cun paucs giasts

Las vischnancas da Breil e Mustér han inditgà l'emna passada cifras stimadas davart ils giasts en abitaziuns secundaras. A Mustér hajan els inditgà var 35 persunas la fin d'emna e 150 persunas durant l'emna, uschia il chanzlist Andri Hendry. A Breil munta il dumber a 40 fin 50 persunas. Vul dir: I dat bain insaquants giasts che nizzegian lur domicil da vacanzas, ma en relaziun è quai pauc.

Ils hotels èn serrads, las pendicularas, la glieud na po betg ir cun skis... Cumpareglià cun auters onns hai pli pauc, ma i ha segir glieud che passenta il temp ch'els han forsa survegnì sfurzadamain liber qua tar nus.
Autur: Andri Hendry chanzlist da Mustér

Engiadina ha in pau dapli giasts

Tant il president communal da Bever sco er quel da Schlarigna conferman che baininqual chasa saja occupada. A Bever stima Fadri Guidon ch'igl haja tanta glieud sco uschiglio er, ma probabel pli pauc ch'en in bun onn normal. E ses collega da Schlarigna, Christian Brantschen, agiunta ch'igl haja bain abitaziuns occupadas, ma quai na saja betg exagerà. I n'haja segir betg tants giasts sco da Nadal e Bumaun.

San Murezzan ha analisà il diever da forza electrica. Sco il president communal, Christian Jenny, ha ditg envers radio SRF, mussian las cifras cleramain ch'ina buna part da las abitaziuns e chasas da vacanzas sajan occupadas il mument.

Nus avain in'infrastructura ch'è bajegiada per la stagiun auta. Nus avain blers giasts che vegnan gia dapi blers onns e nus vivain da quels. Jau crai ch'igl è noss pensum d'avair en funcziun questa infrastructura er uss.
Autur: Fadri Guidon president communal da Bever

Paucs u nagins quitads

Ch'i pudess dar problems pli gronds, perquai ch'igl ha entras ils possessurs da segundas abitaziuns dapli glieud en vischnanca, na crai nagin dals dumandads. Er betg areguard las capacitads en ils ospitals. Tant ils responsabels da la vischnanca da Surses sco er il president communal da Schlarigna han argumentà che l'infrastructura saja bajegiada per la stagiun auta. Pia ch'igl haja avunda capacitads.

Ord l'archiv

video
Fugia da las citads?
Or da Giuventetgna dals 19.03.2020.
laschar ir. Durada: 1 minuta 24 Secundas.

RTR actualitad 07:00

Artitgels legids il pli savens