Dapli cas a Scuol
Schegea che l'ospital a Scuol ha gia gì in onn da record il 2018/2019 sur ils dis da Nadal e Bumaun è quella cifra vegnida surpassada quest onn per 8%. Il directur Joachim Koppenburg declera ch’ins haja tractà enturn 100 pazients durant ils firads. Da quests pazients sajan ils blers stads blessads levamain. Gliez sa declera Koppenhug cun las bunas cundiziuns sin pista.
Samedan, Savognin e Cuira constant cun l'onn avant
Era l'ospital Engiadin'Ota a Samedan ha gì bler da far cun radund 700 cas durant ils dis da festa. Tenor il directur Beat Moll hai dà 20% pli paucs cas staziunars per suenter dapli pazients ambulants. L’emprima emna da vacanzas enturn Nadal saja stada ruassaivla. A la fin da l’onn saja lura l’unda da pazients arrivada. Ins saja dentant stà preparà sin questa situaziun. L'ospital a Savognin en il Grischun central ha gì enturn 100 ed l'ospital chantunal a Cuira enturn 300 cas. Questas cifras sajan cumparegliablas cun quellas dals onns vargai. Christoph Sommer, il schefmedi da la chirurgia d’accidents a Cuira discurra d’in start intensiv: «Igl è in temps lavurus, ed uschia vai vinavant en l'ospital».
Ospital Glion cun pli paucs pazients
Il sulet ospital dumandà ch'ha gì marcantamain pli paucs cas sur ils firads è stà Glion cun 310 cas. Cumpareglià cun l’onn passà èn quai 65 pli paucs. Matthias Müller da l'ospital regiunal a Glion agiuntescha dentant che l’onn passà saja gia stà in onn da record.
RTR actualitad 07:00