Simon May ha sco manader da l'institut per fatschentas giuvnas gia gidà a pli che 2'000 firmas al success. Per el è il temp avant la fundaziun bunamain tant impurtant sco tut quai che gira suenter la fundaziun d'ina firma.
Impurtant saja da studegiar schon avant che cumenzar a lavurar, da studegiar precis tge ch'ins vul cuntanscher. Sper las chaussas obligatoricas sco in plan da fatschenta saja surtut er impurtant da survegnir uschè baud sco pussaivel resuns – e quai betg mo dals megliers collegas u da las meglras collegas.
Per fundar ina firma dovran ins er raps. Tut tenor tge ch'ins vul producir u vender variescha natiralmain il budget. Cunquai ch'ins na po betg quintar da far a partir da l'emprim di gudogn, stoppian ins planisar cun avunda reservas. «Ina regla generala è ch'ins sto vegnir tras 6 fin 12 mais senza far gudogn», uschia Simon May.
RTR actualitad 08:00