La Fundaziun medias rumantschas è vegnida fundada per pudair garantir vinavant ina purschida da medias rumantschas en tun, maletg e text. Cun serrar il quint annual ha la Lia Rumantscha surdà uffizialmain il project FMR. Cler che las delegadas ed ils delegads spetgan da la FMR ch'els adempleschian lur intent. Dentant datti er ina u l'autra aspectativa.
Las gasettas rumantschas
Il mund da las medias sa sviluppa adina vinavant. En in temp, cura che tut vegn pli digital han cunzunt las gasettas difficultads. Las gasettas rumantschas vegnan perquai a fatschentar la FMR. Da quai è er pertschert l'emprim schefredactur da la FMR, David Truttmann. En il discurs cun noss moderatur Rafael Müller ha el dà pled e fatg, e quai anc avant ch'el ha cumenzà uffizialmain sia lavur.
La collavuraziun tranter las gasettas existentas duai sa meglierar, quai vul er David Truttmann. Cunzunt la dumonda, co La Quotidiana duai en futur guardar ora, para da fatschentar.
Cun La Quotidiana vai vinavant sco fin qua, almain per in tschert temp.
Cun La Quotidiana existia vairamain gia ina gasetta quotidiana interrumantscha, ina gasetta per tuttas Rumantschas e tuts Rumantschs. Per l'entschatta na sa mida er nagut vid quella, di Truttmann. Er las autras gasettas regiunalas (Pagina da Surmeir, Posta Ladina etc.) datti vinavant e senza gronds midaments.
Ils idioms na vegnan cun garanzia betg a la curta.
La FMR na po betg vegnir e dar sin maisa e vulair midar las gasettas existentas, di Truttmann. Er sch'ella furnescha istorgias e novitads a las medias rumantschas, na po ella betg influenzar ferm la vart redacziunala da las gasettas.
Il temp da giugar ora in medium cunter l'auter, quel na pudain nus betg pli ans prestar aifer las medias rumantschas. Uschiglio n'avain nus in di insumma nagut pli.
Temp transitoric enfin l'auter onn
Cun il prim da november cumenza la lavur dal nov schefredactur David Truttmann. Fin la fin da quest onn datti ina fasa transitorica. Uffizialmain entschaivan las lavurs da la fundaziun lura cun l'entschatta da l'auter onn.
RR actualitad 07:00
