La regenza grischuna vul fusiunar la dretgira chantunala e la dretgira d'administraziun. Cun fusiunar vegnissan las structuras professiunalisadas e cun quai er pli effizientas, scriva la regenza en sia missiva al Cussegl grond.
Plinavant fetschia ina fusiun er senn per raschuns statalas e politicas. Ina dretgira chantunala superiura fusiunada vegniss represchentada en il Cussegl grond cun ina vusch. Er las duas dretgiras sustegnan ina fusiun.
Ins duvrass mo pli ina administraziun, in president da las dretgiras ed in lieu. Uschia pudess ins spargnar custs e vegniss pli effizient.
Medemamain vulan ins unir las duas dretgiras sut in tetg. La regenza propona il bajetg dal chantun gist sper il vegl edifizi da la Posta a la Grabenstrasse a Cuira. Quel vegn numnadamain libers pervia dal project Sinergia.
RR novitads 10:00