Fusiuns da vischnancas na rendan betg

Fusiuns da vischnancas vegnan en Svizra savens vendidas cun l'argument da spargnar custs. Dentant n'è quai betg il cas. Quai mussa in studi da l’universitad da Son Gagl.

En tut èn vegnidas prendidas sut la marella 142 vischnancas en Svizra. Tranter quellas er vischnancas dal chantun Grischun. Il studi mussa en media ch'ins na po betg spargnar cun fusiunar. I dat singulas excepziuns, che spargnan cun fusiunar.

In argument pertge che las fusiuns na portan betg l'effect da spargn spetgà è che oravant tut pitschnas vischnancas han era gia avant la fusiun collavurà ensemen.

Nagina surpraisa

«  Il resultat dal studi n'è betg ina surpraisa. »

Thomas Kollegger
schef da l'Uffizi da vischnancas en il Grischun

Spargnar saja be in dals arguments per fusiunar. Pli impurtant saja la qualitad dal servetsch che las vischnancas pon porscher suenter la fusiun.

Il 2016 hai dà en tut quatter fusiuns en il Grischun. Quai èn la vischnanca Surses, Sursaissa-Mundaun, Luzein cun St. Antönien e Claustra cun Serneus. Uschia dumbra il Grischun il mument 114 vischnancas.

Vischnancas fermas e prestaziuns professiunalas

Quai èn tenor Barbara Janom Steiner las finamiras da fusiuns da vischnancas e betg da spargnar.

Che fusiuns da vischnancas n’hajan strusch in effect da spargn n’è nagina surpraisa per la cussegliera guvernativa Barbara Janom Steiner. Per la regenza sajan auters puncts stads centrals da fusiunar. La finamira da las fusiuns saja da stgaffir vischnancas fermas ed independentas che porschian prestaziuns professiunalas, uschia Janom Steiner.

Grischun a la testa sch'i va per daners

Tenor retschertga da la «Rundschau» subvenziuneschan ils chantuns las fusiuns cun totalmain 730 milliuns francs. Il chantun Grischun saja in dals chantuns che survegn ils pli blers raps per fusiuns. Avant il Grischun saja mo anc il Tessin.

RR actualitad 17:00