Ils Verd-liberals avessan gugent fatg part a la colliaziun da la PCD, da la PBD e da la PLD. Quai ha ditg il president dals Verd-liberals grischuns, Christian Stricker, a Radiotelevisiun Svizra Rumantscha. Apparentamain als vesian las 3 partidas sco ina concurrenza.
Per Josias Gasser vegni pli grev
Uss vegnia segiramain pli difficil da tegnair il sez dal cusseglier naziunal Josias Gasser, ha Stricker ditg vinavant. El na detti dentant betg si, ha ditg Josias Gasser ad RTR. Las trais opziuns che restan a la PVL èn: Ina colliaziun cun la PPS, che na vegn betg en dumonda (tenor Gasser e Stricker), ir persuls en il cumbat, che muntass tant sco forfait u ina colliaziun cun la PS. Questa varianta è tenor Josias Gasser la pli valabla ed er la finamira da la PVL.
Jon Pult, il president da la PS Grischun na vuleva dentant anc betg tradir tge varianta che la PS vul. Fin glindesdi, ils 10 d’avust, han las partidas anc temp dad inoltrar a la chanzlia chantunala lur colliaziuns.I dettia anc la pussaivladad da sa colliar cun ils Socialdemocrats. Els hajan gì discussiuns, dapli infurmaziuns na veglian els dentant betg dar il mument.
RR Novitads 20:00