Siglir tar il cuntegn
Inhalt

Chantun «Giagliard» – WEKO refusa reproschas da relativaziun

Che la Cumissiun da concurrenza WEKO ha curregì ses text da pressa davart il scandal dal cartel da construcziun en Engiadina muventa ils spierts dapi la fin d'emna. La «Südostschweiz am Wochenende» aveva rapportà. Uss di la WEKO ch'ella haja precisà e betg relativà ses text en chaussa.

Legende: Audio Saira: WEKO: Cas Engiadina ed il rapport curregì abspielen. Laufzeit 03:01 Minuten.
03:01 min, Actualitad dals 22.10.2018.

Dapi questa fin d'emna dat il scandal da cartel en l'Engiadina puspè da discutar. La raschun actuala per la discussiun è la dumonda schebain ils midaments, che la cumissiun da concurrenza WEKO ha fatg vi da ses text da pressa en chaussa, sajan relativaziuns u precisaziuns.

Da questas passaschas vegn debattà:

En il text oriund aveva la Weko scrit...

«Durant presesidas da la Societad grischuna dals impressaris constructurs han diversas interpresas da construcziun tranter 1997-2008 fixà per radund 350-400 projects da construcziun auta e construcziun bassa en Engiadina Bassa, tge interpresa da construcziun ch'obtegna l'incumbensa per in project da construcziun, ed a medem temp fixà il pretsch da l'offerta».

...ed en il nov text da la Weko vegn be pli menziunà:

«Durant presesidas da la Societad grischuna dals impressaris constructurs han diversas interpresas da construcziun tranter 1997-2008 en Engiadina Bassa fixà, tge interpresa da construcziun ch'obtegn l'incumbensa per in project da construcziun, ed a medem temp fixà il pretsch da l'offerta. Durant presesidas da quest temp èn radund 350-400 projects da construcziun auta e construcziun bassa vegnids tematisads. Davart quants projects da construcziun ch'i ha effectiv dà cunvegnas, n'examinescha la WEKO pervi da la supposiziun d'ina cunvegna globala betg».

«Renfatschas falladas» argumentescha l'advocat

Per Gerald Brei, l'advocat da la Foffa Conrad SA, èsi cler: La WEKO fetschia cun ses text da pressa da l'avrigl renfatschas falladas. Quai ha el ditg envers la gasetta «Südostschweiz am Wochenende» da la sonda passada.

Las reproschas sajan engianusas per las interpresas pertutgadas. Ils responsabels da la WEKO avessan stuì savair ch'els na pon betg affirmar questas pretensiuns. En la disposiziun finala n'haja la WEKO lura er betg menziunà il dumber pretendì da cunvegnas e dal donn, vegn cità Brei en la gasetta.

«Relativaziun è pretaisa giagliarda» replitga uss la WEKO

Per Frank Stüssi, il vicedirectur da la WEKO, è percunter cler che las midadas fatgas na sajan dal cuntegn nà betg relevantas. La WEKO haja precisà – sin giavisch dad ina partida involvida. Quai sajan dentant precisaziuns e betg adattaziuns, intuna Stüssi.

Da pretender che la decisiun saja vegnida relativada saja «giagliard». Vi dal fat da las cunvegnas e lur dimensiuns na sa midia nagut. La cifra da 350-400 projects pertutgads haja la WEKO stimà a maun dad indicaziuns da las firmas. Mintga cas singul hajan ins dentant betg examinà. Quai na saja er betg la lavur da la WEKO, uschè Stüssi.

RR novitads 17:00