Maria Montessori è naschida ils 31 d'avust a Chiaravalle. Gia da giuvna era ella fitg interessada vid la teologia e la scienza natirala. Maria Montessori è perquai ida suenter la scola a studegiar medischina a Roma. Sin la facultad era ella la suletta dunna e cunquai la finala er ina da las emprimas medias da l'Italia.
Gia durant il studi è ella sa focussada sin la pediatria. Suenter il studi ha Maria Montessori perquai lavurà en ina psichiatria d'uffants. Ella aveva cunzunt interess da la lavur cun uffants malsauns dal spiert. Suenter curt temp ha ella constatà ch'i saja impurtant da porscher als uffants la dretga instrucziun per ch'els possian sa sviluppar. Maria Montessori è sinaquai sa focussada sin la pedagogia. Ella ha fundà il 1907 ina chasa per uffants da la classa sociala inferiura ed ha entschet a sviluppar sia atgna furma da pedagogia – la pedagogia tenor Montessori.
«Gida mai da far sez»
En la pedagogia da Montessori vegn lavurà cun material dals senns. Ils uffants emprendan cun nizzegiar lur senns, saja quai pia palpar, udir u vesair. En il center da la pedagogia stat che l'uffant emprendia dad esser sur sasez ed individual. Ils uffants emprendan tenor lur agen tempo e lur agens interess.
