Siglir tar il cuntegn

Chantun Gieus olimpics 2026: Discussiun cun paucas emoziuns

Bleras giadas han ils gieus olimpics procurà per chaus cotschens, per discussiuns emoziunalas. En la discussiun da podium ier saira a Cuira n’hai betg dà bleras emoziuns. Ed era betg blers novs arguments pro ni contra.

Rintgs olimpics davant culms e tschiel blau.
Legenda: Stefan Engler vul ils rintgs olimpics en il Grischun, Silva Semadeni vul cumbatter quai. Keystone

Tant ils arguments dals aderents per ils gieus olimpics sco era quels dals adversaris encunter la candidatura n’èn betg stads novs. Ils blers eran gia enconuschents e menziunads.

Ils aderents speran sin in grond impuls per l’economia ed il turissem. Ils adversaris n’han insumma nagina fidanza en il Comité olimpic internaziunal IOC e teman gronds deficits.

Domenig e Wilhelm persvadan

Ch'ils cussegliers maziunals Stefan Engler (PCD) e Silva Semadeni (PS) enconuschan e san co da questas discussiun èn da far è nagina surpraisa. Da lur vart n’è vegni nagut surprendent.

Interessanta è stada la rolla dal nov president dal PS Grischun, Philipp Wilhelm, che ha gì il grev pensum da surprender la rolla da Jon Pult. Wilhelm s’è preschentà eloquent e cun ina bun’argumentaziun. Quai vala era per Gaudenz Domenig, il president dil HCD. El è persvadì da la candidatura ed ha pliras giadas dà bunas respostas sin la critica dals adversaris.

Emprima decisiun il december en il Cussegl grond

En la sessiun che cumenza ils 5 da december decida ussa il Cussegl grond davart in credit da 25 milliuns francs per la candidatura. Tar in gea, quai ch’è probabel tenor las parolas da las fracziuns, decida il pievel ils 12 da favrer 2017 davart quest credit.

Il mars 2017 decida lura Swiss Olympic tgenina da las quatter candidaturas svizras ch’els vulan sustegnair. Datti dentant in na dil suveran grischun è la candidatura grischuna a la fin.

RR actualitad 08:00+