Siglir tar il cuntegn

Header

cuntegn

Chantun Gieus olimpics cun Turitg èn pauc probabels

La maioritad dal parlament vegnia a s’exprimer cunter gieus olimpics, manegia il parlamentari e co-president dals socialdemocrats da la citad da Turitg, Marco Denoth. «Nus na vulain atgnamain nagins gieus olimpics a Turitg», concluda l’um da Cuira che viva e politisescha a Turitg.

I saja ina chaussa che custia fitg blers daners, ma che portia pauc, uschia Marco Denoth da la PS da Turitg. E perquai vegnia la maioritad dal parlament da la citad era a dir na ad ina participaziun da Turitg, sco quai ch’il concept grischun prevesa. «Nus avain mess las prioritads finanzialas il mument sin l’abitar favuraivel e l’accumpagnament dals uffants durant l’entir di», declera Denoth.

audio
Saira: PS da Turitg na vul nagina participaziun als Gieus olimpics
ord Actualitad dals 29.11.2016.
laschar ir. Durada: 2 minutas 27 Secundas.

Auts custs da segirezza

Politicamain hajan gieus olimpics mo success en la citad da Turitg, sch’i na dettia betg custs supplementars per la citad. E gliez na saja betg pussibel cun tut quai ch’il concept da la candidatura grischuna preveda per la citad da Turitg. Be gia che la festa d’avertura e da finiziun duessan esser tant a San Murezzan sco a Turitg, muntass blers custs per la citad puncto mesiras da segirezza, è Marco Denoth persvas. «Be sche la citad na sto pajar nagut vi dals gieus olimpics, pia era betg per in sulet policist supplementar ch’i dovra per ademplir las mesiras da segirezza, lura è ina participaziun da la citad als gieus olimpics pussaivla.»

Interpellaziun per avair pled en chapitel

Il mument n’ha il parlament da la citad da Turitg dentant anc da dir nagut pertutgant gieus olimpics e la participaziun da Turitg. Fin ussa n’aveva il parlament era betg il basegn da far quai, damai che la regenza da la citad da Turitg aveva refusà cleramain las ultimas dumondas da la regenza grischuna.

Sch’il Grischun va en votaziun cun Turitg en la bartga chat jau quai betg sincer envers ils votants grischuns, ch’ins venda in pachet che n'è uschia betg realisabel.
Autur: Marco Denoth Co-president PS citad Turitg

En sia terza resposta ha ella dentant laschà pli avert ina eventuala participaziun, uschia ch’ils socialdemocrats, ils verds, ils alternativs ed ina maioritad dals verd-liberals han inoltrà l’emna passada ina interpellaziun a la regenza da la citad cun set dumondas. Tranter auter vulan els savair: tge ch'igl è resultà or dals discurs cun la regenza grischuna e tge ch'ella di dal fatg, ch'il Grischun decida davart in concept che prevesa Turitg sco lieu d'occurrenza, schebain che la citad ha gia pliras giadas refusà la collavuraziun.

Far cler als Grischuns che Turitg n’è betg da la partida

L'intent da questa interpellaziun na saja betg en emprima lingia las infurmaziuns ch'ins survegnia qua tras, mabain ch'il parlament possia uschia ina giada discurrer sch'i duai insumma dar gieus olimpics en la citad da Turitg ed uschia forsa era procurar per in zic pli cleras premissas per la votaziun en il Grischun il favrer. Il concept prevesia gea che la citad da Turitg gioghia ina part impurtanta dals gieus, quai che n'è dentant betg exnum il cas tenor Marco Denoth.

RR actualitad 17:00

Artitgels legids il pli savens