Siglir tar il cuntegn

Header

audio
Bunura: Ospital chantunal sa gida cun regiun da Sargans
Or da Actualitad dals 14.01.2020.
laschar ir. Durada: 03:40 minutas.
cuntegn

Ginecologia Mammas enturn Sargans pon parturir a Cuira

Dunnas ch’abitan en la regiun da Sargans e che survegnan la primavaira che vegn in uffant pon er parturir quel en l’Ospital chantunal a Cuira, quai scriva l'ospital en ina communicaziun. Cunquai che la partiziun da ginecologia a Walenstadt serra sias portas pli baud che spetgà, saja l’Ospital chantunal dal Grischun pront da surpigliar pazientas.

Anc l'atun passà hai gì num che l'ospital da Walenstadt serria il 2027 la partiziun da ginecologia. Il november 2019 hai gì num ch'i saja planisà questa partiziun il matg 2020 ed il december hajan els survegnì la novitad, che la ginecologia a Walenstadt vegnia gia serrada il favrer 2020. L'Ospital chantunal dal Grischun survegnia il mument bleras dumondas pazientas e pazients e geniturs che vulan s'infurmar davart parturir a Cuira.

Guardar situaziun ord vista da pazientas

Ins fissi er vinavant pront da collavurar cun ospitals en il chantun Son Gagl, hai num en la communicaziun. Cunzunt en cas sco accidents, naschientschas u attatgas dal cor e tscharvè – na duain betg ils cunfins chantunals, mabain la cuntanschibladad giugar la rolla impurtanta.

Nova regiun d'ospitals per trais chantuns

Ils ospitals dal Grischun, Glaruna e Son Gagl e da la regiun Sargans duain vgnir sut in tetg. Per quai duai vegnir fundada ina regiun d'ospitals «Svizra-sidost» scriva il schurnal regiunal dal Grischun sin sin pagina d'internet. Questa idea vegn sustegnida da l'Ospital chantunal dal Grischun e da Glaruna. La collavuraziun sur ils cunfins chantunals saja impurtanta gi il CEO da l'Ospital chantunal dal Grischun, Arnold Bachmann.

En quest connex hajan l'Ospital chantunal dal Grischun ensemen cun l'Ospital chantunal da Glaruna er inoltrà lur posiziun en il rom da la consultaziun da la regenza da Son Gagl davart la strategia d'ospitals «4plus5».

La discussiun davart ina nova regiun d'ospitals croda entamez la debatta enturn quest nova strategia dal chantun Son Gagl. Lez vul serrar tschintg ospitals, tranter quest quel da Walenstadt, respectiv transfurmar quels en centers da sanadad ed urgenza.

RTR novitads 15:00

Artitgels legids il pli savens

Scrollar a sanestra Scrollar a dretga