Siglir tar il cuntegn
Inhalt

Chantun Giuvenils duain avair ina vusch en la baselgia

Vegnir udids e pudair cun-discurrer davart il svilup da la baselgia – quai è in dals pli gronds giavischs dals giuvens e las giuvnas ch'han discutà e reflectà davart la baselgia en il rom dal project «Giuventetgna@Baselgia».

La runda da discussiun en la bar e local da cultura Werkstatt en la citad veglia da Cuira è stada il punct culminant da l'entir project. Cumenzà aveva quel cun la purschida che giuvenils interessads han pudì empustar in pachet cun tut las ingredienzas per ina buna pasta e latiers hai dà sets da maisa cun patratgs per discutar surlonder.

Verd per quai che plascha ...

A la fin dal di en la Werkstatt a Cuira eran las paraids plainas cun placats e cedels. D'ina vart cun verds per la chaussas ch'ils giuvenils chattan bunas vid la baselgia sco per exempel:

  • la cuminanza
  • structuras e sustegn
  • lavur da giuventetgna cun champs, viadis e servetschs divins spezials
  • la baselgia sco lieu per vegnir a ruaus

... ed oransch per quai che na plascha betg tant

Da l'autra vart eran ils cedels oranschs. Là han ils 14 giuvens e giuvnas da sisum la Surselva fin a Landquart notà giavischs, spetgas e chaussas che na plaschan betg – sco per exempel:

  • pudair cun-discurrer e vegnir udids da la baselgia
  • sinceradad, star tar sbagls e lavurar si ils cas d'abus
  • meglierar l'instrucziun da religiun
  • rumper tabus, per exempel en connex cun l'omosexualitad
  • predis lungurus
  • communitgar en las medias socialas
  • modernisar las messas cun musica actuala, visualisaziuns u er glischs spezialas

Baselgia vul prender serius ils giavischs e restar en dialog

Ils giuvenils han er preschentà lur ideas, spetgas e giavischs a divers represchentants da la baselgia. Tranter auter er a Thomas Bergamin, president da la cumissiun da gestiun da la Baselgia catolica dal chantun Grischun.

En in emprim pass vul el endrizzar ina plattafurma per in barat regular cun la giuventetgna. In'idea concreta co far quai n'ha el anc betg.

Però vesa el er ch'i na basta betg sch'il plevon communitgescha giu da la scantschala u sch'i vegn communitgà en il figl uffizial da la plaiv. Quai na sajan betg ils chanals che vegnan vis da la giuventetgna.

«Pertge betg far in servetsch divin per omosexuals...»

Il manader dal di da discussiun e lavurer da giuventetgna da la baselgia catolica, Claude Bachmann, è stà impressiunà da l'engaschament e da l'avertadad da la gruppa. I na saja betg pussaivel da realisar tut immediatamain, ma ins possia er dar in segn en tge direcziun ch'i duess ir en la lavur locala.

Per exempel tar il tema omosexualitad: Tenor el pudessan ins simplamain ina giada far in servetsch divin per omo- e bisexuals ed uschia mussar ch'er els sajan la baselgia.

Plinavant vul Claude Bachmann guardar a ses schefs tar la baselgia sin la detta e far attent ch'els hajan udì e survegnì ils giavischs e las spetgas. E ch'i saja uss da pigliar serius quai e realisar tschertas chaussas sche la baselgia veglia esser autentica ed avair in avegnir. Ils giuvenils stoppian sentir ch'els vegnian prendids serius e ch'i marschia insatge.

RR actualitad 08:00