Glindesdi pon ils centers da fitness puspè avrir; finalmain, di Eder Lala, il manader dal center da fitness a Tusaun. Els hajan spetgà passa quatter mais sin questa decisiun ed uss saja finalmain uschè lunsch. Era sch'i vegnia tut in zic surprendent.
Nus avain gia spetgà daditg sin l'avertura e tuttina èsi uss ina pitschna surpraisa.
Els sajan dentant pronts per l'avertura. Er perquai ch'ils concepts da protecziun na sajan betg sa midads a la gronda dapi l'atun. Bain stoppian els far intginas adattaziuns, uschia Lala, sin glindesdi saja quai dentant pussibel.
Teater Cuira avra pir il matg
Il Teater Cuira avra pir il matg sias portas. Il motiv n'è tenor il directur Roman Weishaupt dentant betg ch'ins na fiss betg pront, mabain ch'ins haja duas emnas vacanzas da primavaira. Silsuenter vegnian ins alura a porscher in program, era sch'ins haja sulettamain plaz per 50 aspectaturas ed aspectaturs. Quai na saja dentant betg tragic – els sa legrian era sin quels aspectaturs. Weishaupt speria dentant fitg ch'els possian alura almain l'atun far occurrenzas cun dapli persunas. El fiss led sch'ins pudess dar liber alura in terz dals plazs dal teater. Ma quai cuzzia anc in zic.
Far vinavant stoppian ins ussa dentant cun ils bigliets, gia curt suenter l'annunzia dal Cussegl federal da schluccar las mesiras hajan els survegnì emprims telefons e mails.
Chantar pudess vegnir ina sfida
Chantar en chors cun 15 persunas e cun tuttas restricziuns? Quai pudess esser ina sfida, di Rilana Cadruvi, che dirigia il Chor cecilian a Glion, in chor cun radund 30 chantaduras e chantadurs. Il chantar haja da far bler cun la mimica, cun l'entira expressiun, il trair flad, la respiraziun e quai manchia tut cun stuair purtar mascrina.
Ella haja in zic pensieris sch'i fetschia insumma senn da cumenzar puspè sut quellas circumstanzas cun las emprovas. Ella dirigia in chor da laics e quels chantian er per il plaschair e per la cuminanza.
