L’idea è d’avair IN lieu da scolaziun e perscrutaziun. Actualmain èn las localitads da la HTW sparpagliadas en differents lieus a Cuira. La purschida da a la HTW saja centrala per garantir l’innovaziun en il Grischun e per cumbatter la mancanza da persunas qualifitgadas, per exempel en ils secturs da tecnica ed informatica.
Critica per agir da la regenza
Deputadas e deputads n’èn betg cumplainamain cuntents cun l’areal Pulvermühle, che la regenza grischuna ha evaluà sco lieu per il campus. In lieu pli central a Cuira fiss stà pli ideal, uschia il tenor en il Cussegl grond.
Plinavant haja la regenza grischuna retardà l’entir project cun l’evaluaziun, malgrà ch’il project saja urgent ed impurtant per l’economia grischuna. Uss saja dentant da dar gas ed emblidar il passà.
Finamira: Realisar il campus enfin il 2025
Las localitads planisadas sin l’areal Pulvermühle duain porscher plaz ad enfin 2’000 studentas e students. La realisaziun è planisada per l’onn 2025 e custa 125 milliuns francs. Il chantun vul contribuir 90 milliuns.
Tut ils detagls davart il bajetg sto la regenza ussa lavurar ora e preschentar en in ulteriur messadi al Cussegl grond. Previs è ch’il chantun è responsabel per la planisaziun e construcziun e che la HTW surpiglia silsuenter ils edifizis.
RR actualitad 18.00
