GRhome per indigens e possessurs d’abitaziuns secundaras

La purschida da la cuminanza d’interess turissem en il Grischun GRhome è vegnida lantschada e quai cun tut las regiuns turisticas dal chantun. Promover vul il nov chanal da social media la schientscha per il turissem en tut las regiuns.

Robin Mark in dals responsabels per la software preschenta la plattafurma GRhome. Bild in Lightbox öffnen.

Legenda da maletgs: Robin Mark in dals responsabels per la software preschenta la plattafurma GRhome. RTR, Gion Gieri Flepp

Surtut duai dar dapli emoziuns per megliurar la tenuta envers il turissem. Uschia na duajan ils indigens e persunas che possedan ina abitaziun en il Grischun betg pli guardar tras ina fanestra sin il turissem mabain far part da quel, scriva la cuminanza d’interess turissem en il Grischun.

Ils avantatgs da la nova app e pagina online

Sin GRhome.ch pon tuts mirar tge che curra e passa en il Grischun. Uschia datti tips regiunals, events, fotos, clips, novitads ed era autras purschidas. L’app è gratuita. Era èsi previs che utilisader ch’èn fitg activs pon profitar da premis. Uschia datti per exempel mintga di purschidas exclusivas en 30 hotels en il chantun che porschan a partir da las quatter suentermezdi per la mesadad dal pretsch ina chombra anc betg occupada e 80 ustarias porschan lur spezialitads per in pretsch exclusiv.

Emprender d’enconuscher l’entir chantun

Era duai la purschida nova motivar ils indigens e las persunas cun ina abitaziun secundara da scuvrir era autras regiuns dal chantun e lur purschida turistica. Planisà è da porscher a tut ils indigens tips exclusivs en lur lingua – sulettamain per els. La communitad duai uschia crescher e generar agens cuntegns per la purschida en futur, scriva la communitad per il turissem en il Grischun.

Regenza beneventa l’acziun

Cusseglier guvernativ Jon Domenic Parolini numna GRhome in project exemplaric per la cooperaziun turistica en il chantun. I saja bun da promover ina schientscha per il turissem en il chantun. Che utilisaders fitg activs vegnan remunerads per tips persunals e cun il program da loialitad cumpletteschia la purschida, ha ditg Parolini. Perquai che l’entir turissem grischun surpiglia la mesadad dals custs da 1,9 milliuns francs surpiglia l’autra mesadad il Chantun communabel cun la Confederaziun.

RR actualitad 17:00