Siglir tar il cuntegn
Inhalt

Chantun Grischun: Dus accidents tar dus runals

En il territori da skis da Val Son Pieder è sa blessada ina buoba grevamain cun crudar or dal runal ed a Grüsch Danusa è in um vegnì tutgà dad ina suga da runal. Ils dus accidents èn vegnids communitgads da la polizia.

L'helicopter sin pista.
Legenda: Il helicopter è platgà per evacuar l'um blessà a Grüsch Danusa. mad

Ils dus accidents tar ils dus runals grischuns èn tuts dus succedids il venderdi enturn mezdi.

Val Son Pieder: Matta (8) grevamain blessada

La matta era en viadi cun dus auters uffants cun il runal, cura ch’ella è dada giu da la staffa. Sinaquai è ella glischnada in lung toc dal trassè giu – uschia la polizia. Accumpagnada da sia mamma è ella vegnida transportada cun l'helicopter en l’ospital a Cuira.

La polizia tschertga perditgas che pon far indicaziuns tar l’accident.

Grüsch Danusa: Um (43) è vegnì tutgà da la suga dad in runal

L’um è ì cun skis tar il runal Schwendi, cura che la suga dal runal saja siglida or dal spol dad ina pitga. La suga haja tutgà l’um, che purtava ina chapellina vi dal chau, scriva la polizia.

Er el è vegnì transportà cun blessuras betg anc scleridas cun l’helicopter en l’ospital a Cuira.

La polizia chantunala ed il concordat interchantunal per pendicularas e runals IKKS investigheschan il cas.

RR novitads 20:00