Siglir tar il cuntegn

Header

Martin Jäger, il minister d'educaziun dal chantun Grischun
Legenda: Martin Jäger , il minister d'educaziun dal chantun Grischun ANR, F. Andry
cuntegn

Chantun Grischun ha reglas pli severas per la matura

Avant dacurt ha il cusseglier federal Johann Schneider Ammann crititgà il niveau dals maturands Svizzers. Perquai less el midar il sistem da cumpensar notas schlettas en matematica ed en linguatg. En il Grischun dat quai gia ina regla in zic pli severa ch'en auters chantuns.

Oz vala la regla: Tgi che ha en l'attestat da matura in punct sut la nota quatter, po cumpensar quel cun dus puncts sur il da quatter.

Ils Grischuns èn pli severs ch'il rest da la Svizra

Schlettas notas en matematica ubain linguatg na duain dentant betg pli pudair vegnir cumpensadas uschè simpel, vul il cusseglier federal Johann Schneider Amman. Quai per auzar il nivel dals maturands. Pli gugent pli paucs, persuenter megliers maturands, ha el ditg envers la NZZ.

Il Grischun enconuscha dentant gia ina regla in zic pli severa per survegnir la matura. Qua èsi numnadamain dapi in onn la regla, che nagin scolar vegn promovì sch'el ha ina nota sut 2,5. Il chantun saja interessà che la qualitad da la matura saja buna, pia che maturandas e maturands na sajan betg mo buns da cumenzar in studi, mabain er da terminar quel.

Quai che pertutga la quota da maturitad gimnasiala è il Grischun cun 18 pertschient en la media dals chantuns da la Svizra. La pli auta quota da maturands ha il chantun Tessin cun 29 pertschient. La pli bassa quota il chantun Son Gagl cun 14 pertschient.