Siglir tar il cuntegn

Header

cuntegn

Chantun Grischun noda 9'000 pernottaziuns damain per november passà

Il november 2015 ha il Grischun nudà 80'000 pernottaziuns. Envers il november 2014 è quai in minus da 10,2% ed envers la media dals ultims 5 onns è quai in minus da 14,3%.

Legenda:
Pernottaziuns GR (november 2015): Svilup da las destinaziuns grischunas dal schaner fin november 2015 cumpareglià cun la media dals ultims 5 onns. Uffizi per economia e turissem GR

Cumpareglià cun l'onn passà resulta per la hotellaria grischuna il november in minus da sur 10%, communitgescha l'Uffizi grischun per economia e turissem.

Pertutgadas èn surtut las destinaziuns Tavau Claustra (-36,2%), Val Son Pieder (-31,2%) ed il Partenz (-23%). Cun grondas differenzas regiunalas han pliras destinaziuns sco Bravuogn Filisur e la Val Bregaglia registrà in plus.

Minus en 9 da 14 regiuns turisticas svizras

Las pernottaziuns en Svizra èn stadas stabilas il mais november. En total ha la hotellaria svizra registrà il november 1,9 milliuns pernottaziuns.

Cumpareglià cun il november 2014 è quai in plus da 1'700 pernottaziuns u 0,1%. Quasi in milliun pernottaziuns derivan da giasts da l'exteriur, scriva l'Uffizi federal da statistica. Ils giasts svizzers han procurà per 871’000 pernottaziuns (-0,6%).

En nov da 14 regiuns turisticas da la Svizra èsi da constatar ina sminuziun da las pernottaziuns. Il pli fitg ha patì il Valais cun 9’700 pernottaziuns damain ch’il november 2014. Curt suenter sa chatta il chantun Grischun cun in minus da 10,2% u 9’100 pernottaziuns. Genevra ha però nudà plus da 6,4%, ed er per il Tessin e la Part Sura Bernaisa sa mussa in trend ensi (+4,3%).

Dapli giasts da l’Asia, damain da l’Europa

Per il temp da schaner fin november 2015 po la Svizra uschia nudar 33,1 milliuns pernottaziuns. Quai è bunamain in quart milliun pli pauc che per la medema perioda dal 2014.

In trend che l’uffizi noda è l’augment dals giasts asiatics (+12,6%). Il pli ferm augment è d’attribuir als Stadis dal Golf, che han procurà per 6’300 pernottaziuns dapli.

Percunter para la Svizra d’esser main attractiva per giasts da l’Europa (senza Svizra). Totalmain resulta per il november ina digren da 28’000 pernottaziuns. Il pli fitg èn sa sminuidas las cifras da giasts tudestgs.

RR novitads 11:00

Artitgels legids il pli savens

Scrollar a sanestra Scrollar a dretga