Siglir tar il cuntegn

Chantun Grischun sa prepara per cumbatter pandemias

L'Ospital chantunal dal Grischun survegn sustegn per endrizzar ina staziun per cumbatter pandemias. La regenza grischuna propona al Cussegl grond da conceder in credit da 1,7 milliuns francs per quai intent.

Ina squitta.
Legenda: Ulteriuras staziuns per cumbatter cunter pandemias na vegnan betg duvradas en il chantun, scriva la regenza. Keystone

La staziun duai vegnir construida en il rom da la sanaziun actuala da l'ospital. En la nova chasa da letgs è in plaun concepì sco staziun cun 18 chombras d'isolaziun. En il cas normal vegnan quellas però duvradas sco chombras normalas da la clinica d'uffants.

Lieu central per motivs d'effizienza

Cun plazzar la staziun en in lieu central en l'ospital chantunal dal Grischun possian ins concentrar ils meds medicinals necessaris per l'entir chantun ed applitgar quels en moda effizienta, scriva la regenza.

Sa preparar per pandemia eventuala

Particularmain en vista a la ristga d'ina eventuala pandemia pari ord vista da la regenza raschunaivel da preparar en l'ospital chantunal ina staziun per cumbatter cunter pandemias, che stat a disposiziun a l'entir chantun.

RR novitads 10:00