Siglir tar il cuntegn

Header

cuntegn

Chantun Grischun vacanzas a la tschertga da novs giasts

Il martgà da vacanzas è sa midà ils ultims onns, la conjunctura è plitost flaivla, decisiuns politicas ed il ferm franc na levgeschan er betg la situaziun. Ord questas raschuns vul Grischun vacanzas sa posiziunar da nov e preschenta sia strategia per ils onns 2017 fin 2020.

A partir dal 2017 lavura l'organisaziun da marketing Grischun vacanzas cun ina strategia che sa basa sin trais pitgas:

  • cumpetenzas ed innovaziun: construcziun da centers da cumpetenza per la digitalisaziun; tschertgar novs partenaris da l'economia, tecnologia e turissem. En il mund digital saja impurtant dad esser il dretg mument en il dretg lieu cun la dretga offerta. Là, nua che quai vegnia cudeschà ozendi, numnadamain en l'internet, di Marcel Friberg, president da Grischun vacanzas.
  • svilup da products e marketing: novs products che van sur pliras destinaziuns e distribuziun en Svizra ed en l'exteriur. I saja impurtant da preschentar novs projects cuminaivels, perquai che mintgin sulet n'haja betg tantas schanzas.
  • in'offerta pli vasta per las destinaziuns ed ils furniturs da servetschs: ina pli vasta purschida da servetschs per destinaziuns e furniturs da servetschs per nizzegiar ils potenzials da commerzialisaziun e digitalisaziun

audio
Mezdi: Grischun vacanzas - la nova strategia 2017-2020
ord Actualitad dals 29.04.2016.
laschar ir. Durada: 5 minutas 4 Secundas.

Questa strategia vegn realisada pass per pass ils proxims mais, scriva Grischun vacanzas. La finamira saja da tegnair ils giasts actuals en il Grischun e da motivar els da restar pli ditg. En pli vul l’organisaziun er che novs giasts vegnan en il Grischun. Novas fieras na duajan dentant betg vegnir conquistadas da maniera classica cun ir en novas tiaras, mabain las novas fieras èn gruppas da persunas, per exempel bikers ubain viandants. Cunzunt persunas da la Svizra less Grischun vacanzas da nov carmalar en il Grischun. La nova strategia da Grischun vacanzas vala per ils onns 2017 fin 2020.

audio
Saira: GR vacanzas – Strategia nova versus la veglia
ord Actualitad dals 29.04.2016.
laschar ir. Durada: 2 minutas 56 Secundas.

Ella è vegnida elavurada en collavuraziun cun il Departament per l'economia publica e fatgs socials dal Grischun e cun ils partenaris turistics impurtants.

Esser l’emprim sin google

Tgi che vul cudeschar vacanzas dumonda sco emprim anc gugent google per in cussegl. E quant present èn lura las destinaziuns dal Grischun sin google? Sche jau sun da la Svizra e tschertgel cun «Ferien Graubünden» vegnan tut tenor ritmus da google sco emprim ina giada las annunzias. Pia paginas che han pajà ed èn perquai lura er las emprimas. Tut tenor po quai pia esser che Grischun vacanzas è pir sin plaz 3 ubain 4. Dentant en general n’è quai betg in grond problem da chattar differentas destinaziuns grischunas.

audio
Cudischar vacanzas: quant preschent è il Grischun sin google?
ord Actualitad dals 29.04.2016.
laschar ir. Durada: 3 minutas 17 Secundas.

Pli grev è quai, sch’in american tschertga vacanzas en Svizra. Cun la tschertga «vacation» ubain «travel» e «Switzerland» sin in computer ch’è drizzà sin l’America, n’è il Grischun betg uschè simpel da chattar. Er qua vegnan l’emprim diversas plattafurmas che vendan vacanzas. Dentant en il cas da la Svizra è quai bleras giadas turas tras l’entira Svizra. Da Genevra sur Berna e Lucerna enfin a Turitg. Il Grischun è dentant il pli betg previs per in stop. Be mintgatant va ina da questas turas er tras San Murezzan.

audio
GR vacanzas vul daventar pli digital
ord Actualitad dals 29.04.2016.
laschar ir. Durada: 1 minuta 16 Secundas.

Daventar ils emprims sin google, quai na saja betg exnum la finamira la pli urgenta da Grischun vacanzas. Pli impurtant saja, da plazzar la dretga offerta sin portals pli specifics, per exempel portals per bikers ubain per viandants.

RR novitads 12:00

Artitgels legids il pli savens